Потпретседателот на ДУИ, Арбер Адеми, остро реагира на политиките на новата влада, обвинувајќи ја дека се обидува да ги врати Албанците во состојбата во која беа пред конфликтот во 2001 година.
Во своето гостување во емисијата „Дијалог те Лајми“, Адеми оцени дека се води организирана кампања од страна на двете најголеми македонски партии, ВМРО-ДПМНЕ и СДСМ, со цел Албанците да бидат исклучени од процесите на одлучување.
„Во јавноста сè погласно се зборува за таканаречено ‘второ полувреме’, кое наводно треба да ја коригира ‘предноста’ на Албанците по 2001. Според мене, тоа не само што е политички некоректно, туку и невозможно“, изјави Адеми.
Тој обвини дека во 2022 година, со посредство на олигархиски интереси, бил постигнат неформален договор меѓу ВМРО-ДПМНЕ и СДСМ за маргинализирање на Албанците.
На прашањето од водителот дали Македонците можат да го добијат „второто полувреме“, Адеми категорично одговори:
„Како што планираат – никако. Ова веќе не е Македонија од пред 2001 година. Ова е нова реалност и Албанците нема да дозволат да бидат избришани од процесите на одлучување.“
Адеми со оваа порака предупредува на опасноста од враќање кон ретроградни политики и повика на почитување на реалноста и на правата на сите заедници во земјата.
