Опозициската партија СДСМ денеска ја повика власта, предводена од ВМРО-ДПМНЕ, веднаш да ја декласифицира целата документација поврзана со наводното следење на премиерот Христијан Мицкоски.
Во соопштението за јавност, СДСМ наведува дека „наводната шпионска афера“ која била подготвувана со месеци, им се „вратила како бумеранг“ и ги повикува властите да покажат храброст и да ја објават вистината.
„Не чекајте ни истрага, ни ништо. Нека видат граѓаните дали бил вистински следен премиерот, кој бил следен, со кого комуницирал тој. Бидете еднаш во вашето 30-годишно постоење храбри и чесни, барем тоа му го должите на овој народ“, стои во соопштението.
СДСМ тврди дека нема од што да се плаши и инсистира на тоа дека документите можат да бидат декласифицирани за само еден ден. Од партијата ја обвинуваат власта дека со измислени скандали и „криминални романи“ се обидува да ја прикрие сопствената неспособност во управувањето со државата.
