Министерот за здравство, Азир Алиу, активно учествуваше на 21-виот Конгрес на лекари, каде во фокусот на дискусијата беше дигитализацијата и новите технологии во здравствениот систем.
За време на панелот „Solving Human Health“, министерот Алиу истакна дека граѓаните се технолошки подготвени за поголемо дигитално учество во здравството.
„Наша цел се едноставни и практични решенија што ќе им донесат директна корист на пациентите: полесен пристап до податоци, навремени информации и заштита на нивните податоци. Системот ‘Мој Термин’, апликацијата ‘Мое Здравје’ и идните национални мрежи за радиологија и телемедицина се чекор напред во таа насока“, изјави министерот.
На панел дискусијата учествуваше и Далибор Фртуниќ, извршен директор на СОРСИКС, кој нагласи дека дигитализацијата на здравството во Северна Македонија е на светско ниво.
„Податоците што постојат се богатство кое ќе овозможи напредни чекори во вештачката интелигенција и ‘data-driven decision-making’, за бенефит и на системот и на клиничката пракса“, рече Фртуниќ.
На панелот беше истакната потребата од:
- Целосна интероперабилност на системите.
- Поголема употреба на алатки за анализа и предвидување.
- Воспоставување на национална радиолошка мрежа (PACS) и пилот-проекти за телемедицина.
- Глобална соработка со меѓународни иницијативи.
Преку новите дигитални решенија ќе се овозможи поефикасно управување со листите на чекање, следење на епидемиолошки состојби и поголема ефикасност на скрининг-програмите.
