Политичката партија Алијанса за Албанците (АА) денеска остро реагираше, обвинувајќи дека Македонија е прогласена за „српска територија“ со одобрение од Владата на чело со ВМРО-ДПМНЕ и коалицијата ВЛЕН.
Во соопштението, АА тврди дека министерката за труд и социјална политика на Србија официјално го најавила спроведувањето на проектот за вклучување на Македонија во т.н. „српски свет“.
Партијата истакнува дека:
- Битола и Охрид биле прогласени за српски градови.
- Српското знаме било прогласено за „Знаме на единството“.
Сето ова се случило во присуство на вицепремиерот Иван Стоилковиќ, што, според АА, претставува официјално одобрение од Владата на Северна Македонија.
АА наведува дека присуството на српска полиција и војници на настанот симболизира „окупација на земјата“ и го крши Уставот и суверенитетот на Македонија.
Според Алијансата за Албанците, овие акции ја менуваат ориентацијата на земјата, претворајќи ја од независна држава и членка на НАТО во „српска покраина“ и „полигон на Србија и Русија“. Партијата смета дека со тоа се потврдуваат нивните предупредувања дека Владата на ВМРО-ЗНАМ ја прави земјата дел од „српскиот свет“.
