Американскиот државен секретар Марко Рубио денеска во Ерусалим изјави дека сите заложници мора веднаш да бидат вратени дома, а Хамас како вооружена група мора да биде „уништена“. Тој истакна дека овие цели остануваат приоритет на администрацијата на претседателот Доналд Трамп.
Рубио го критикуваше Хамас за неговиот „неспоредлив варваризам“ и додаде дека мирот и подобрата иднина за народот на Газа не се можни сè додека групата не биде разоружана и не ги ослободи сите заложници.
Загриженост за Иран и состанок со Нетанјаху
Државниот секретар, исто така, нагласи дека Иран претставува закана не само за Израел и САД, туку и за сојузниците во Персискиот Залив и Европа, и дека нуклеарен Иран е „неприфатлив ризик“.
Рубио пристигна во Израел за да му го пренесе на премиерот Бенјамин Нетанјаху незадоволството на САД од неодамнешниот израелски напад врз Доха, Катар. Пред состанокот, тој најави дека ќе разговара со Нетанјаху и за воените планови на Израел за окупирање на градот Газа, како и за намерата на Израел да анектира делови од окупираниот Западен Брег.
