На 14 јуни 2025 година, Вашингтон ќе биде домаќин на најголемата воена парада во последните децении, организирана по повод 250-годишнината од основањето на Армијата на САД, која истовремено се совпаѓа со 79-тиот роденден на претседателот Доналд Трамп. Настанот, кој ќе чини меѓу 25 и 45 милиони долари, ќе вклучи околу 6.700 војници, 84 воени возила, 50 хеликоптери и историски реконструкции на воени конфликти од Револуционерната војна до денешните операции.
Парадата ќе се одржи на Конститиушн авенија, а ќе заврши со скок на падобранци од тимот „Златни витези“, кои ќе му предадат преклопено знаме на претседателот Трамп. Во рамките на настанот, ќе се положи заклетва на нови 250 војници, а ќе има и вечерен концерт со кантри музика и огномет.
Иако Армијата на САД нагласува дека парадата е фокусирана на нејзината историја и не е официјално поврзана со роденденот на Трамп, критичарите ја обвинуваат администрацијата за политизирање на воениот настан. Градските власти изразија загриженост за можни оштетувања на инфраструктурата поради тежината на воените возила, но Армијата презема мерки за заштита на патиштата и се обврза да ги покрие евентуалните трошоци за поправки.
Парадата е класифицирана како „национален специјален безбедносен настан“, што подразбира засилени безбедносни мерки и присуство на голем број посетители, вклучително и очекувани 20.000 демонстранти кои ќе протестираат против претседателот Трамп и милитаризацијата на прославата.
