Фудбалската репрезентација на Англија ја декласира Србија на нејзин терен со убедливи 5:0, во натпревар од Квалификациите за Светското првенство.
Англија е апсолутен лидер во групата К со пет победи од пет натпревари, и ѝ е потребна само уште една победа за да обезбеди директен пласман на Мундијалот следното лето. Србија, пак, со овој пораз, ќе се бори со Албанија за второто место и шанса за пласман преку бараж.
Натпреварот беше „еднонасочна улица“ од првата до последната минута, при што српските фудбалери ниту еднаш не се заканија кон голот на Пикфорд.
Иако Србите се држеа во првите 30 минути, Англија го проби нивниот низок блок во 32. минута со гол на Кејн. Само три минути подоцна, Мадуеке ја зголеми предноста на 2:0, со што стана јасно кој ќе биде победник.
Во второто полувреме, централните дефанзивци Конса и Гуеи постигнаа голови, а по црвениот картон на Миленковиќ, Рашфорд од пенал го постави конечниот резултат од 5:0 во 90. минута.
