Кандидатот за градоначалник на Општина Ѓорче Петров, Костадин Ацевски, во дебата на МРТ изјави дека има клучни проекти за хуман развој на општината и дека е време за промени.
Ацевски нагласи дека неговата визија е за „чиста и уредена општина“ со средени јавни и нови зелени површини, пешачки патеки и содржини за најмладите, како и градинки без листи на чекање.
„Ѓорче Петров ќе биде општина каде урбанизацијата нема да биде синоним за бетонизација, ќе го запреме бетонирањето во општината“, порача Ацевски.
Тој ја критикуваше досегашната политика, истакнувајќи: „Развоен буџет не е буџет кој се темели на изградба на згради, особено не со 30 висококатници во срцето на Ѓорче, тој буџет не е ни развоен, ни реален.“ Според него, постојано се менуваат плановите за нови згради, додека цели простори во општината немаат донесено Детални урбанистички планови (ДУП).
