Фудбалерите на Баерн Минхен забележаа убедлива победа од 3:0 (2:0) на гостувањето кај Ајнтрахт во Франкфурт, во натпревар од 6. коло на германската Бундеслига.
Натпреварот го одбележа колумбискиот играч Луис Дијас, кој постигна два гола за Баварците, вклучувајќи го и најбрзиот гол сезонава во Бундеслигата, постигнат по само 15 секунди игра. По почетниот удар, Серж Гнабри одзеде една топка и го проигра Дијас на втората статива за рано водство.
Дека Баерн ќе забележи лесна победа стана јасно во 27. минута кога предноста ја зголеми Хари Кејн. За Англичанецот ова беше 18. гол од почетокот на сезоната.
Конечниот резултат од 3:0 го постави повторно Луис Дијас со својот втор гол на натпреварот во 84. минута.
Актуелниот шампион го задржа својот максимален учинок на првото место на табелата со 18 бода, додека Ајнтрахт остана на шестото место со девет бода.
