Ламин Јамал, еден од најталентираните напаѓачи во светот, официјално го продолжи договорот со Барселона до јуни 2031 година. Каталонскиот гигант го нарече Јамал „сегашноста и иднината“ на клубот, потврдувајќи дека на потпишувањето присуствувале претседателот Џоан Лапорта, првиот потпретседател Рафа Јусте и спортскиот директор Деко.
Според шпанските медиуми, новиот договор му носи годишна плата од 20 милиони евра, плус речиси 10 милиони евра бонуси, што е огромен скок во однос на претходните 1,6 милиони евра. Со ова, Јамал стана трет најплатен фудбалер во тимот – веднаш зад Френки де Јонг (23 милиони евра) и Роберт Левандовски (25 милиони евра).
Јамал го направи своето деби за сениорскиот тим како петнаесетгодишник на 29 април 2023 година. Во клубот е уште од својата седма година, како дел од прочуената академија Ла Масија.
Иако сè уште е тинејџер, веќе има одиграно 106 натпревари за Барселона, со 25 постигнати голови и 34 асистенции. Тој веќе ги урна бројните рекорди: најмлад стрелец во историјата на Ла Лига, Кралскиот Куп и Суперкупот, како и најмладиот фудбалер на Барса со над 100 одиграни натпревари.
Оваа сезона беше клучен во освојувањето на двојната круна и Суперкупот на Шпанија, а сите показатели упатуваат дека неговото време – допрва доаѓа.
