Според официјалните податоци од Управата за јавни приходи (УЈП), во 2024 година е забележан пад во бројот на граѓани кои пријавиле доход од издавање имот под закуп. И покрај намалениот број обврзници, износот на наплатен данок се зголемил, што укажува на зголемување на приходите од оваа дејност.
Во 2024 година, 71.671 даночен обврзник пријавил доход од закуп, што е помалку во однос на 74.540 во 2023 година. Сепак, наплатениот данок за 2024 година изнесува 897,9 милиони денари (14,6 милиони евра), што е повеќе од 814,4 милиони денари (13,2 милиони евра) наплатени во 2023 година.
Контрола и санкции
Од УЈП објаснуваат дека контролата на приходите од закуп се врши преку општи проверки на сите парични текови кај даночните обврзници. Доколку се констатира непријавен доход, се пресметува и задолжува данок на личен доход, заедно со камата за задоцнето плаќање.
Во однос на краткорочните закупи преку платформи како Airbnb и Booking, од УЈП посочуваат дека работат на обезбедување податоци преку соработка со даночните администрации на други земји и од банките, кои ги следат трансакциите кон овие провајдери. Дополнително, се воспоставува соработка со агенции за недвижности и интернет-платформи за да се соберат податоци за сопствениците на имот.
Даночна стапка и основа
Даночната стапка за доход од закуп е 10 проценти. Даночната основа се пресметува како бруто-доходот, намален за нормирани трошоци.
10% од доходот за ненаместени простории.
15% од доходот за опремени станбени и деловни простории.
На данок подлежи доходот од издавање земјиште, станбени и деловни простории, гаражи, викендички, опрема, превозни средства и друг имот.
Податоци од Катастар
Според Агенцијата за катастар на недвижности, во 2024 година под закуп биле издадени 8.481 недвижност со вредност од 4,2 милиони евра. Од овој број, само 2.979 биле станови, што е благо намалување во однос на претходната година.
Извор: Bloomberg Adria
