Ново истражување на „Буревестник“ открива наводна организирана мрежа од компании и лица со бугарски документи за идентификација и пасоши која стои зад финансирањето на ВМРО-ДПМНЕ. Истражувањето тврди дека овие фирми, од кои дел се регистрирани во Бугарија, се користат за перење пари од сомнителни бизниси, шверц и изнуда, со цел да се финансира партијата, премиерот Христијан Мицкоски и претседателот Гордана Силјановска.
Во истражувањето се посочуваат две клучни фигури, братучеди со бугарско државјанство, како најголеми донатори на ВМРО-ДПМНЕ:
Јорданчо Јанев – Дано: Јавно се претставува како противник на „бугаризацијата“, но поседува бугарско државјанство. Истражувањето дополнително наведува дека Јанев е баџанак на премиерот Христијан Мицкоски. Неговата фирма „Дано транс“ ЕООД остварува голем обрт во лева, пари кои се користат за финансирање на кампањите.
Донче Карастоев: Братучед на Јанев и сопственик на „Инфинити транспорт груп“.
Двајцата заеднички управуваат со фирмата „Шалом деливери“ ДОО во Струмица, која работи во угостителството и трговијата со храна, алкохол и цигари. Тие, наводно, контролираат широка мрежа од компании во Бугарија и Северна Македонија, меѓу кои „Филисте“, „Леса транспорт“, „Слагор“, „Бранекс транспорт“ и „Драги Здравевски“.
Како нивно „поставено лице“ во Струмица се споменува и Петар Јанков, кандидат за градоначалник од ВМРО-ДПМНЕ.
Финансиски трансакции и енергетски интереси
Истражувањето открива и соработка со струмичкиот бизнисмен Горан Крстев од 2023 година. Пролетта 2024 година, непосредно пред парламентарните избори, „Дано транс“ добила заеми од над 500.000 евра преку компаниите на Крстев – „Интернешнл груп“ и „Хелиоцентрум“. Крстев и неговиот татко имаат значајни интереси во производството на електрична енергија.
Влијание врз институциите
Според „Буревестник“, мрежата има сериозно влијание врз клучни државни институции во Струмица и на национално ниво, вклучувајќи ги:
- Управата за јавни приходи (УЈП)
- Царината
- Обвинителството во Струмица
- Бирото за јавна безбедност
- Пазарната инспекција
Истражувањето заклучува дека лица блиски до Јанев и Карастоев се на клучни позиции во овие институции, што овозможува непречено финансирање и перење пари. Парите стекнати во Бугарија од фирми со македонски сопственици со бугарски пасоши, наводно, се користат за водење антибугарска политика во Северна Македонија.
Екипата на „Буревестник“ најави дека ќе продолжи со објавување нови материјали по нивна детална проверка.
Извор: Буревестник
