Кандидатот за градоначалник на Општина Чаир од Националната алијанса за интеграција, Бујар Османи, денеска ги претстави своите клучни здравствени проекти, најавувајќи целосно нов пристап во локалната здравствена политика фокусиран на превенцијата и директна грижа за граѓаните.
Османи најави три главни столба во програмата, како одговор на загрижувачката состојба во општината, каде што, според него, 30% од децата имаат хронични заболувања на белите дробови поради нечистотија.
Главниот проект е воспоставување на мобилна болница – караван кој секојдневно ќе патува во различни населени места во Чаир:
Мобилна болница: „Секој ден во едно маало ќе има мобилна болница, во која граѓаните доброволно ќе можат да направат бесплатни превентивни здравствени прегледи.“ Ова е клучно за зголемување на општата свест.
Здравствени тимови за повозрасните: За пензионерите и лицата што живеат сами, ќе бидат подготвени здравствени тимови составени од лекари и медицински сестри кои ќе ги посетуваат во нивните домови кога ќе има потреба.
Османи нагласи дека се бори против состојбата во Чаир каде „четири лица дневно завршуваат на операциона маса“ поради урбаниот хаос и сообраќајните несреќи.
Како трет столб, Османи најави посебни превентивни програми за жените:
Ран скрининг: Фокус на раното откривање на рак на дојка.
Поддршка: Програми за поддршка на физичкото и менталното здравје на жените.
„Прашањето за жените беше најважниот приоритет во здравствената програма. Општината ќе има посебни проекти за приоретизирање на нивното здравје,“ рече Османи.
Тој заклучи дека новата визија за здравството се темели на превенцијата, а не на скапи и задоцнети интервенции.
