Кандидатот за градоначалник на Општина Чаир, Бујар Османи, ја обвини актуелната општинска администрација за, како што го нарече, „масовен систем за извлекување пари од буџетот“. На средба со граѓани, тој истакна дека општинските пари се злоупотребуваат преку фиктивни договори.
Според Османи, 67% од општинскиот буџет се троши на плати, а остатокот за „фиктивни работни ангажмани“. Тој тврди дека во јули имало 720 фиктивни договори за лица кои седат дома и пишуваат статуси против него, што месечно чини 350.000 евра.
Османи ги повика граѓаните да ја проверат платформата „Отворени финансии“ (Open Finance) на Министерството за финансии, каде што може да се види како се троши јавниот буџет. Тој изрази огорченост што со парите на граѓаните се плаќаат активисти на нова партија.
Кандидатот за градоначалник посочи дека со тие пари може да се реализираат сериозни проекти, а 720-те лица може да се ангажираат за одржување на хигиената во општината, со што би се спречило Чаир да биде најзагадената општина во Скопје. Османи го заклучи своето обраќање со порака дека секој потрошен денар од буџетот е аманет, а неговата злоупотреба е неморална.
