Ракометниот клуб Вардар го засилува стручниот штаб со едно звучно име: поранешниот хрватски репрезентативец и легендарен голман Марио Келентриќ од следната сезона ќе биде новиот тренер на голманите во сениорскиот тим.
Келентриќ, кој со Хрватска стана светски шампион во 2003 година и олимписки вицешампион во Атина 2004, носи врвно искуство, меѓународен кредибилитет и огромна пасија кон голманскиот занает. Неговата главна задача ќе биде индивидуален развој и подигнување на формата на голманите во првиот тим на Вардар.
Старо-нови улоги во стручниот кадар
Досегашниот тренер на голманите, Стојан Петрушевски, останува дел од клубот, но се префрла на нова позиција – ќе биде задолжен за развој на младите категории и скаутирање на нови таленти. Со тоа, Вардар јасно демонстрира долгорочна визија и стратегија за создавање на „домашни вардарови производи“ во иднина.
Кариера со европски печат
Во својата играчка кариера, Келентриќ бранеше за неколку елитни клубови, меѓу кои: ППД Загреб, Целје, Метковиќ, Тусем Есен и Мелсунген. Како тренер, работеше во германскиот Гумерсбах каде четири години беше задолжен за сите категории на голмани. Има и репрезентативно искуство како дел од стручниот штаб на Босна и Херцеговина, а кратки ангажмани имаше и во ППД Загреб и Слога Добој.
Со неговото доаѓање, Вардар добива ментор кој знае како се освојуваат титули – и кој има мисија повторно да го крене клубот кон европскиот врв.
