Американскиот потпретседател Џеј Ди Венс денеска изјави дека претседателот Доналд Трамп бара целосна транспарентност во истрагата за Џефри Епштајн, и обвини три претходни администрации, на Џо Бајден, Барак Обама и Џорџ В. Буш, дека го прикривале случајот.
„Претседателот му наложи на државниот обвинител да ги објави сите веродостојни информации и, искрено, да пронајде дополнителни поврзани со случајот Џефри Епштајн. Тој е исклучително транспарентен во однос на ова, но дел од тој процес бара време“, изјави Венс на настан во Кантон, пренесува CNN.
Венс откри дека е во постојан контакт со државната обвинителка Пем Бонди, која според него „вредно работи“ на истрагата.
Тој остро ги критикуваше претходните администрации, особено на Обама и Буш, нарекувајќи го Епштајн „педофилски олош“ и „посрамен финансиски магнат“, кој не бил адекватно истражуван од тогашните власти.
„Ниту една од тие администрации не го истражи сериозно случајот, ниту пак покажа искрено интересирање. Сега, кога претседателот Трамп бара целосна транспарентност од Министерството за правда, критиките одеднаш се насочени кон него, наместо кон оние што го игнорираа случајот со години“, додаде потпретседателот.
Во времето на администрацијата на Џорџ В. Буш, тогашниот американски обвинител Алекс Акоста – кој подоцна служеше и како министер за труд во првата администрација на Трамп – одби да го гони Епштајн на федерално ниво, што му овозможи да избегне сериозни обвиненија.
Епштајн, кој почина во притвор во 2019 година под сомнителни околности, беше обвинет за трговија со малолетни девојчиња и сексуална експлоатација на малолетнички. Случајот останува една од најконтроверзните и најобвиткани со тајни во поновата американска историја.
