Пратеникот на ВМРО-ДПМНЕ, Бране Петрушевски, одржа прес-конференција на која ги обвини СДС, Зоран Заев и Венко Филипче за злоупотреба на Агенцијата за национална безбедност (АНБ) и Агенцијата за разузнавање (АР). Според него, службите за безбедност и разузнавање во периодот од 2019 до 2024 година работеле за политички цели, спроведувајќи прогон и хајка против ВМРО-ДПМНЕ, замолчување на новинари и уцена на бизнисмени.
„Ова е скандал од невидени размери“, изјави Петрушевски, нагласувајќи дека партијата која дојде на власт со проектот „Вистината за Македонија“, седум години подоцна ја открива „поинакво, грдо и болно лице“.
Петрушевски тврди дека Христијан Мицкоски, тогашен лидер на опозицијата, бил неосновано ставен на оперативна обработка од службите.
„Според сознанијата кои ги имаме, претседателот Мицкоски, неосновано и со една единствена цел, политичка елиминација, бил ставен на оперативна обработка од страна на службите кои ги воделе кадри на СДС“, рече пратеникот.
Тој директно ги посочи поранешните директори на АНБ, Виктор Димовски и Заре Милошески, како и директорот на АР, Еролд Муслиу, дека го следеле движењето, комуникацијата и делувањето на Мицкоски. Петрушевски ова го оцени како крајно тоталитаристички чин, „кој не е виден никаде во развиените западни демократии, особено не во последните 100 години“.
Петрушевски побара итна и недвосмислена акција од Јавното обвинителство (ЈО), барајќи одговорност од Димовски, Милошески, Муслиу и нивните политички наредбодавци во врвот на СДС.
Пратеникот постави неколку прашања, меѓу кои:
Кој бил одговорен за следењето на ПИМ мерките (Посебни истражни мерки) од 2019 до 2024 година и дали тоа е актуелниот јавен обвинител Љупчо Коцевски?
Кому му служеле прислушуваните материјали и дали со нив се тргувало со влијание и се уценувале бизнисмени?
Петрушевски на крајот нагласи дека ваквата пракса мора да биде казнета и никогаш да не се повтори.
