Пратеникот на ВМРО-ДПМНЕ, Бране Петрушевски, на прес-конференција изјави дека СДСМ признале дека прислушувале и следеле преку Агенцијата за национална безбедност (АНБ) и Агенцијата за разузнавање (АР). Тој смета дека СДСМ треба да се извинат за, како што вели, „5 години следење“ на премиерот Мицкоски, новинари и бизнисмени, заедно со нивните семејства.
Според Петрушевски, наместо да се извинат, од СДСМ „лажат и манипулираат“.
Барање за одговорност и критики кон ЈО
ВМРО-ДПМНЕ бара СДСМ да ги повикаат на одговорност поранешните директори на службите Виктор Димовски и Еролд Муслиу, како и актуелниот шеф на Јавното обвинителство (ЈО), Љупчо Коцевски.
Петрушевски го обвини ЈО дека „со денови молчи и не презема никаква акција“, додека „СДСМ од петни жили ги штити сите кои ги злоупотребувале институциите, затоа што очигледно работеле по партиска задача“.
„Загрозена била приватноста на голем број луѓе цели 5 години. Службите влегле во нивните животи, со цел да го забават падот на СДС од власт и нивно што подолго одржување, а со цел распродажба на државните интереси и правење на криминал“, рече Петрушевски.
Тој предупреди дека доколку ЈО и Коцевски останат пасивни, и тие ќе сносат одговорност.
