Коалицијата ВРЕДИ жестоко ја нападна Демократската унија за интеграција (ДУИ), обвинувајќи ја дека го злоупотребува концептот на ветинг за да го одвлече вниманието од корупциските скандали и богатството на своите функционери.
„Секогаш кога ДУИ не знае како да се одбрани од јавноста и прашањата за криминалот на своите водечки луѓе, од ракав ја вади истата, веќе излитена парола — ветинг. Сметаат дека ако доволно гласно и често зборуваат за тоа, ќе ги покријат скандалите и ќе ги натераат граѓаните да заборават кој всушност се тие“, реагираа од ВРЕДИ.
Од коалицијата прашуваат зошто ДУИ, за време на своето 20-годишно владеење, не го спровела ветингот ако навистина ѝ било до правдата.
„Што ги спречи сите овие години да го спроведат? Или ветингот им е резервна тема за кога ќе дојдат во опозиција, а додека се на власт, се занимаваат со тендери, фотоволтаици, трговски и печатници“, стои во реакцијата.
ВРЕДИ посочува дека вистински ветинг треба да се спроведе внатре во партијата на Ахмети и коалицијата што ја предводи, вклучително со испитување на имотот на неговото семејство и поврзаните фирми на деца, зетовци и сватови.
„Ветинг за Артан Груби и неговата поврзаност со казино-бизнисот, лиценците за коцкање поврзани со подземјето, како и за неговото место на американската црна листа.
Ветинг за Бујар Османи и аферите поврзани со СЈО, набавките и екстравагантните трошоци за ОБСЕ самитот.
Ветинг за Арбен Таравари, за лиценците за канабис, тендерите за роднини и сомнителните имоти.
Ветинг за Блерим Беџети, за зградите низ Сарај и врските со Мијалков и Груевски“, наведуваат од ВРЕДИ.
Во завршницата на своето соопштение, ВРЕДИ порачува дека „најсилниот ветинг допрва доаѓа — народниот“, алудирајќи на претстојните локални избори, кога, како што велат, граѓаните ќе ја казнат злоупотребата на власта за лична корист.
