Политичката коалиција „Вреди“ денеска упати остри критики кон ДУИ, обвинувајќи ја дека 20 години го злоупотребувала принципот на правична застапеност за корупција и партиско вработување. Според „Вреди“, ДУИ, која ја нарекува „Алијанса на коалиции на интереси (АКИ)“, преку валкани зделки и клански интереси спречила донесување на закон за правична застапеност уште во 2003 година.
„За нив, правичната застапеност не беше еднаквост, туку начин за вработување на внуци, внуки и партиски милитанти“, се вели во соопштението на „Вреди“.
„Вреди“ ветува дека ќе донесе функционална еднаквост
Од „Вреди“ нагласуваат дека сега, благодарение на новата влада, „неправдата завршува“. Со новиот закон, секоја институција ќе мора да го почитува и унапредува принципот на фер и соодветна застапеност.
За да се обезбеди спроведувањето на законот, ќе се формира Владино координативно тело, предводено од вицепремиерот. Во рок од шест месеци, сите секторски закони ќе бидат усогласени со новите обврски, со што еднаквоста и правдата ќе станат „функционален стандард за сите граѓани“.
Коалицијата „Вреди“ истакнува дека разликата помеѓу нив и ДУИ е во пристапот. Додека ДУИ ги користела институциите за лично богатење, „Вреди“ вели дека ги користи за да донесе еднаквост и правда. „Тие го сменија Кривичниот законик за да ги спасат сопствените корумпирани, ние ги менуваме законите за да гарантираме правична застапеност за сите“, се вели во соопштението.
