Актуелната претседателка на Советот на општина Битола од движењето „Поинаку“, Габриела Илиевска, на својата фејсбук-страница официјално ја објави својата кандидатура за градоначалничка на Битола. Таа ќе се бори како независен кандидат, повикувајќи ги сите битолчани на заеднички фронт против, како што вели, „30-годишното партиско уништување на градот“.
Илиевска ги повика сите граѓани, без разлика на нивната политичка припадност, да ја поддржат за создавање на „поубава, почиста, непартиска и независна Битола“.
Таа ги повика битолчани да се спротивстават на уцените за работни места, тендери и директорски позиции, нагласувајќи дека ова е првпат Битола да има можност да одлучи за својата иднина без притисоци.
Илиевска призна дека нема финансиски средства за кампања, маркетинг или плаќање на гласови, но истакна дека поседува „храброст, знаење, интегритет, чесност и достоинство“ да се спротивстави на оние кои, според неа, досега само го „краделе градот“.
„Време е Битола да биде независна! Време е сите ние да си ја вратиме Битола!“, напиша Илиевска, заклучувајќи ја својата објава со слоганот: „Еден за сите, сите за Битола! Битола на граѓаните! И ќе победиме“.
