Актуелните светски шампиони, репрезентативците на Германија, се првите финалисти на 42. Евробаскет, откако во првото полуфинале ја победија Финска со 98:86.
И покрај тоа што Германците важеа за фаворити, Финците одлично го почнаа натпреварот и поведоа со 18:11. Сепак, Германија потоа направи серија од 0:11, ја презеде контролата и првото полувреме го заврши со дури 61 поен.
Германската репрезентација во еден момент имаше предност од 19 поени, но Финците одбиваа да се предадат и успеаја да ја намалат разликата на само шест поени до крајот на третата четвртина. Во решавачкиот период, Финците не успеаја да погодат, постигнувајќи само два поени во првите четири минути, што им овозможи на Германците да ја одржат двоцифрената разлика и да стигнат до заслужена победа.
Најдобар во редовите на Германија беше Денис Шредер со 26 поени, 12 асистенции и 4 скока, додека Франц Вагнер постигна 22 поени, од кои 20 во првото полувреме. Кај Финска, најдобри беа Оливие Енкамуа со 21 поен и Лаури Марканен со 16 поени.
Германија ќе се бори за своето второ злато на континенталните првенства против победникот од натпреварот меѓу Грција и Турција.
