Македонскиот атлетичар Дарио Ивановски го заврши маратонот на Светското првенство во Токио, освојувајќи го 58-тото место со време од 02:26:31.
Неговиот тренер, Игор Јакимовски, во објава на социјалните мрежи изјави дека Ивановски успешно и достоинствено ја претставил Македонија на овој глобален спортски собир.
Јакимовски потенцираше дека условите за маратонот биле „ненормални“, алудирајќи на екстремната влажност, поради што многу од фаворитите се откажале од трката.
„Ви гарантирам дека тој во вакви ненормални услови за маратон го даде својот максимум и јавноста нека оцени слободно за неговиот резултат и освоено место“, напиша Јакимовски.
На крајот, тој му оддаде јавно признание и почит на Дарио за финишираниот маратон и се заблагодари за поддршката.
