Што убаво, државата ни цвета! Како пеперутка од кожурец, се раѓаат нови херои, нови гуруа, нови светилки во мракот на транзицијата. А најсјајна од сите, секако, е ѕвездата на нашиот главен јунак. Запознајте го! Човекот-оркестар, бизнисменот-градител, началникот на цела држава, медиумски гуру. Сè во едно, како среќа, ве молам!
Велат дека за да успееш, треба да бидеш на сите фронтови. Нашиот човек го сфатил тоа буквално. Од градежни машини, преку началник на цела држава, до менаџер на медиумски кампањи. Како парите да му се лепат, а обврските да му се лизгаат. Сериозен, амбициозен, посветен на каузата… кога тоа му одговара.
Последново, на пример, е кампањата за независни градоначалници. Со душа се договорил, со очи светнати од перспективи, ги убедил медиумите да ги поддржат. Како бисери да реди, говорел за соработка, за заеднички успех, за подобра иднина на сите. Но, кога дошло време за исплата, бисерите се претвориле во камења. Договорите се заборавиле, зборовите се изгубиле. Како да се работи за некоја апстрактна уметност, а не за пари и труд. Можеби мисли дека луѓето работат за воздух? Или можеби мисли дека е толку важен што дури и медиумите треба да го спонзорираат?
Ама тоа не е сè! Нашенецот си има поголеми соништа. Додека другите мислат на дневница, тој мисли на „Бехтел и Енка“. Си вика: „Зошто да се мачам со малите проекти, кога можам да купам нова машина од 200 илјади евра?“ Човекот не гледа напред, тој гледа далеку, многу далеку… сè до следната провизија. Ех, колку мудро, колку генијално!
Се чини дека нашето општество стана рај за вакви „градители“. Човекот кој ги игнорира малите должнички обврски, но сонува за милионски договори. Кој ветува кули и градови, но не сака да плати ни за еден камен. Но, ајде да не му судиме! Можеби само заборавил. Или можеби е толку зафатен што немал време да погледне во својот нов пасош, каде што пишува дека е граѓанин со обврски.
Ако некогаш треба да се гради паметна Македонија, дајте да му дадеме шанса на овој човек. Само се прашувам, дали ќе ни побара пари за воздухот што го дишеме? Ама ајде, нека ни е жив и здрав, нашиот херој!
Името на нашиот јунак го оставаме на читателите. Сигурни сме дека секој од вас ќе си препознае по еден, ако не и повеќе, во неговиот лик…
Пишува: Пријателот
