Окружното обвинителство на Софија покрена обвинение против докторот Ненад Цоневски за намерно сурово однесување кон животно, дело кое е казниво според бугарскиот Кривичен законик. Обвинението доаѓа откако Цоневски, поранешен специјалист на Воено-медицинската академија (ВМА), беше снимен како го прегазува кучето Маја во Софија, кое потоа мораше да биде евтаназирано.
Инцидентот предизвика силна јавна реакција. Денеска, во 16:30 часот, пред централниот влез на ВМА во Софија ќе се одржи протест под слоганот „Правда за Маја“, со цел борба против суровоста кон животните и поддршка на построги законски санкции.
Раководството на Воено-медицинската академија, каде што Цоневски работел, претходно оваа недела објави дека докторот е привремено суспендиран од својата позиција додека случајот целосно не се расветли.
Бугарските медиуми вчера објавија дека докторот Цоневски ја напуштил Бугарија и се вратил во Северна Македонија.
„Специјалистот по торакална хирургија, д-р Ненад Цоневски, кој беше снимен на 9 ноември како го прегазува кучето Маја… се врати кај своите родители во неговиот роден град Делчево, Северна Македонија“, објави весникот „Телеграф“.
Пред да ја напушти Бугарија, докторот бил испрашуван во полициска станица, по што бил ослободен.
