Со нова одлука на Собранието, Владата предводена од Министерството за финансии обезбеди дополнителни 600 милиони денари наменети за инфраструктурни и капитални проекти во општините, како дел од стратегијата за рамномерен локален развој и економски раст.
Министерката за финансии, Гордана Димитриеска-Кочоска, истакна дека средствата се дел од Предлог-одлуката за прераспределба на буџетски средства за 2025 година, која денеска беше изгласана во законодавниот дом.
> „Дополнителните 600 милиони денари ќе бидат ставени на располагање на општините за спроведување на проекти што директно го подобруваат квалитетот на животот на граѓаните и ја зајакнуваат локалната економија. Со ова ја потврдуваме определбата на Владата за силна поддршка на локалниот развој“, изјави Димитриеска-Кочоска.
Средствата ќе се распределат преку надлежните министерства, според динамиката на реализација на проектите и врз основа на јавно објавени повици и утврдени критериуми. Проектите се избрани од вториот јавен повик на кој општините аплицираа со конкретни развојни иницијативи.
Покрај средствата за локален развој, прераспределбата овозможува и дополнителни 242,3 милиони денари за Министерството за социјална политика, демографија и млади – за исплата на надоместоци за социјална заштита
Дополнителни средства добиваат и:
Министерството за образование и наука – 361,2 милиони денари
Министерството за спорт – 62,4 милиони денари
Министерството за култура – 60 милиони денари
Станува збор за дополнување на постоечките буџети за 2025 година, согласно новоприфатените проекти доставени од општините. Со ова, Владата најавува посилна финансиска поддршка за локалните самоуправи, со акцент на развојна инфраструктура, култура, спорт и образование – сè со цел подобрување на секојдневието на граѓаните во сите краишта на земјата.
