Демократската унија за интеграција (ДУИ) изрази длабока индигнација и силно противење на новиот состав на Олимпискиот комитет на Северна Македонија (ОКСМ). Според партијата, Албанците се речиси целосно исклучени од раководните и одлучувачките структури, што е „шокантен показател за дискриминаторски пристап“.
ДУИ посочува дека од вкупно 117 членови, само 4 се Албанци. Уште поалармантно, во клучните органи како што се Управниот одбор, Олимпискиот совет и Спортскиот арбитражен суд (САС), нема ниту еден Албанец.
Партијата даде детална анализа на застапеноста во повеќе комисии и тела:
- Управен одбор: 0 Албанци од 11 членови.
- Олимписки совет: 0 Албанци од 11 членови.
- Спортски арбитражен суд (САС): 0 Албанци.
- Собрание на ОКСМ: само 1 Албанец од 25 членови со право на глас.
ДУИ смета дека ова не е само пропуст, туку „јасна слика на исклучувачки менталитет“, кој е спротивен на духот на Охридскиот договор и на принципите на еднаквост.
Од ДУИ бараат итно преиспитување на составот и обезбедување на пропорционална застапеност на Албанците на сите нивоа на Олимпискиот комитет. Според нив, секое одложување претставува удар врз еднаквите права и опасен чекор назад за меѓуетничката стабилност во земјата.
Партијата нагласува дека ќе продолжи да се бори за еднаквост и за духот на Охридскиот договор во сите институции и области.
