Опозициската партија ДУИ денеска соопшти дека изјавите на Максим Димитриевски против Бадентеровото мнозинство се дел од „оркестрирана кампања“ на актуелната влада. Според ДУИ, оваа кампања има за цел да ги урне темелите на Охридскиот мировен договор и да ја врати државата „назад – во неправда и исклучување“.
Партијата предводена од Али Ахмети ги наброја наводните напади на владата врз принципите на еднаквост:
- Укинување на балансерот, со што, според ДУИ, се поткопува правичното претставување на Албанците и другите заедници во државните институции.
- Девалвирање на Охридскиот договор, со тоа што неговата имплементација му е доверена на Иван Стоилковиќ, личност со „антиалбански и путинистички убедувања“.
- Бришење на дијаспората од пресметките за општински совети во областите со албанско мнозинство.
- Девалвирање на Инспекторатот за употреба на јазиците со одземање на статусот на правно лице.
- Трансформирање на Агенцијата за примена на јазиците во нефункционална институција.
ДУИ нагласи дека сега Димитриевски отвора нов фронт против Бадентеровото мнозинство, кое е клучен механизам за еднаквост. Партијата потсети дека токму Димитриевски им забранил на претставниците на ВРЕДИ да го користат албанското знаме и денес го релативизира Охридскиот договор како „исполнет“ и „надминат“.
Според ДУИ, ова е продолжение на агендата на ВМРО-ДПМНЕ за која отворено се зборувало пред изборите, а која ги вклучувала иницијативите за укинување на Законот за употреба на јазиците.
