Пред утрешниот пријателски натпревар помеѓу Саудиска Арабија и Македонија во Прага, репрезентативецот Елиф Елмас изјави дека иако е пријателски, овој меч го смета за важен тест и добра подготовка за претстојниот квалификациски натпревар со Лихтенштајн.
„За нас пријателски натпревари не постојат. Овој дуел ќе ни даде многу, затоа што сите ќе видиме до каде сме и какви подготовки имавме. Играме против сериозен ривал, гледавме снимки од Саудиска Арабија и затоа ќе имаме максимален фокус. Овој меч е одлична подготовка и увертира за дуелот со Лихтенштајн“, изјави Елмас.
Тој нагласи дека се чувствува подготвен по добрите подготовки и дека со нетрпение очекува да настапи на натпревар со голема важност по подолго време.
Елмас предупреди дека Саудиска Арабија е тим кој игра со голем посед на топката, поради што македонските фудбалери ќе мора да бидат максимално концентрирани.
„Ние секогаш излегуваме на терен по победа, свесни за квалитетот кој го имаме. Секој настап за Македонија е мотив плус и верувам дека овој пријателски натпревар ќе биде од голема корист за нас“, заклучи Елмас.
