Талибанците издадоа нова, застрашувачка наредба насочена кон тајните салони за убавина низ Авганистан. Жените кои ги водат овие бизниси имаат рок од еден месец да престанат со работа, или ќе се соочат со апсење.
Иако сите салони за убавина беа официјално затворени во август 2023 година, при што 12.000 бизниси беа укинати, а 50.000 жени останаа без работа, многу козметичарки продолжија тајно да работат за да ги прехранат своите семејства.
Сега, Талибанците имаат намера целосно да ги искоренат овие тајни бизниси. Тие ги повикаа лидерите на заедниците и постарите лица да ги идентификуваат салоните и да ги пријават нивните сопственички кај полицијата за пороци и доблести.
Една од жените, 38-годишната Фреста, мајка на три деца, раскажува за својата ситуација. Таа го водела салонот тајно бидејќи нема друг извор на приход, а нејзиниот сопруг е болен.
„Кога Талибанците ги затворија салоните, јас бев единствената што го хранеше моето семејство. Но, сега мислам дека не можам да продолжам, бидејќи ризикот е превисок. Нашата ситуација е многу лоша, но нема никој на овој свет да ги чуе нашите гласови или да нè поддржи“, изјави Фреста.
Откако Талибанците ја презедоа власта во август 2021 година, животот на жените и девојчињата во Авганистан е целосно променет. Ним им е забрането да одат на работа и на училиште, не смеат да патуваат без машка придружба, мора да бидат целосно покриени кога излегуваат од дома и не смеат гласно да зборуваат во јавност.
Групите за човекови права тврдат дека Талибанците спроведуваат де факто систем на родов апартхејд, со што жените се спречени да учествуваат во каков било облик на јавен живот.
