Утрово, силен земјотрес со јачина од 6,1 степени според Рихтеровата скала го погоди морскиот регион северно од грчкиот остров Крит. Епицентарот бил на околу 56 километри североисточно од Ираклион, на длабочина од приближно 60 километри.
Земјотресот бил почувствуван низ целата Егејска област, вклучувајќи ги и островите Санторини и Родос, како и во соседните земји Турција и Израел.
И покрај силата на потресот, засега нема пријавени повреди или значителни материјални штети. Грчките власти издадоа предупредување за цунами и ги повикаа жителите и туристите да се оддалечат од крајбрежјето и да се упатат кон повисоки места како мерка на претпазливост.
Грчката противпожарна служба е ставена во состојба на висока готовност, иако досега нема извештаи за сериозни инциденти.
Овој земјотрес е втор со слична јачина што го погодува регионот во последната недела, што предизвикува загриженост за зголемена сеизмичка активност во областа.
Грција се наоѓа на неколку големи тектонски раседи и често е погодена од земјотреси. Сепак, експертите истакнуваат дека поради големата длабочина на епицентарот, ризикот од сериозни последици е намален.
