Билјана Ивановска, поранешна претседателка на ДКСК, денеска официјално беше претставена како кандидатка за градоначалничка на Општина Центар на претстојните локални избори, поддржана од платформата „Независни заедно“ и граѓанските иницијативи „Шанса за Центар“, „Зелените за Гази Баба“ и „Групација 398“.
Ивановска изјави дека нејзината кампања ќе се фокусира на решенија, а не на обвинувања. Таа истакна дека нејзините заложби се секогаш граѓаните пред партиите. Според неа, Општина Центар е загадена не само со ПМ честички, туку и со лоши политики и корупција.
Кандидатката ги наведе три столба на кои ќе се базира нејзината кампања:
Одговорност, отчетност и транспарентност.
Инклузивност, бидејќи секој граѓанин е важен.
Заедништво и солидарност.
Ивановска изјави дека нејзината визија е „Општина Центар да биде на граѓаните, а не на профитот“, и дека не бара моќ и функција, туку сака моќта да им ја врати на граѓаните.
Наместо да зборува за конкретни проекти, Ивановска истакна дека целта ѝ е да постави нови и здрави основи во општината. Таа најави дека нема да дозволува детални урбанистички планови кои не се усогласени со Генералниот урбанистички план, како што е случајот со изградбата кај „Холидеј ин“.
Ивановска додаде дека ќе се залага за воведување на стандардот 3-33-300, што значи секој од прозорец да гледа три дрва, на секој жител да има 30 квадратни метри зеленило и секој да живее на 300 метри од парк.
Од платформата „Независни заедно“ соопштија дека се отворени за соработка со сите независни групи и најавија дека ќе имаат и кандидат за градоначалник на Град Скопје.
