Министерството за здравство информира дека иницирало инспекциски надзор до Државниот санитарен и здравствен инспекторат (ДСЗИ) во врска со случајот на починатата пациентка во Инфективното одделение на Општата болница во Тетово.
„Јавноста ќе биде навремено известена по завршувањето на постапката за утврдување на фактичката состојба. Министерството за здравство останува посветено на транспарентноста, одговорноста и обезбедувањето квалитетна здравствена заштита за сите граѓани“, се вели во соопштението на МЗ.
Полицијата и обвинителството испитуваат
Настанот бил пријавен во СВР Тетово денеска во 03:20 часот од страна на Ј.С. од село Копанце, тетовско. Тој пријавил дека негова 30-годишна роднина, С.С., била хоспитализирана на Инфективното одделение, но набргу починала.
Според пријавителот, пациентката била примена на лекување претходниот ден во 19:00 часот, а тој тврди дека не ѝ била укажана соодветна лекарска помош, по што починала. Полициски службеници од СВР Тетово веднаш излегле на местото на настанот. Формиран е тим за испитување на случајот, кој ќе го води дежурен јавен обвинител во содејство со екипа од СВР Тетово.
