Во пресрет на изборите, разговараме со Игор Каравилоски, кандидат за градоначалник на Општина Кривогаштани од СДСМ. Тој ги открива своите планови, визии и конкретни проекти со кои планира да ги реши најгорливите проблеми на граѓаните. Од подобрување на инфраструктурата и водоснабдувањето, до поддршка на земјоделството и грижа за младите и ранливите категории.
Разговараше: Виктор Азманоски
Азманоски: Г-дин Каравилоски, кои се вашите три главни приоритети за развој на Општина Кривогаштани и како планирате да ги реализирате?
Каравилоски: Моите три главни приоритети произлегуваат директно од потребите на граѓаните.
Прво – сигурно и квалитетно водоснабдување преку поврзувањето на локалната водоводна мрежа со регионалниот систем „Студенчица“. Тоа ќе значи стабилно водоснабдување за сите населени места и трајно решавање на проблемот кој со децении ги мачи жителите.
Второ – целосна изградба или доградба на канализационата мрежа во сите населени места, како и модернизација на пречистителните станици. Со тоа ќе ги заштитиме подземните води, ќе обезбедиме почиста животна средина и ќе се усогласиме со европските стандарди.
Трето – економски развој преку поддршка на земјоделството и отворање нови можности за младите. Со развој на Агро – индустриски центар во Славеј и вложувања во младински проекти, ќе создадеме нови работни места и причини луѓето да останат во општината.
Овие приоритети ќе ги реализираме со комбинација на општинскиот буџет, европските фондови (ИПАРД и ИПА), државни програми и преку јавно-приватни партнерства.
Азманоски: Според вас, кои се најголемите предизвици со кои се соочуваат жителите на општината и што ќе преземете за да ги решите?
Каравилоски: Прво, инфраструктурата – чести дефекти на водоводот, делумно покривање со канализација и неасфалтирани патишта во повеќе населени места.
Второ, иселувањето на младите. Нема иднина без млади луѓе. Наша обврска е да создадеме услови тие да останат тука.
Азманоски: Каков е вашиот план за подобрување на инфраструктурата, особено во однос на водоснабдувањето, патиштата и канализацијата?
Каравилоски: Инфраструктурата е темелот за развојот и жалосно е што во 2025 година сеуште зборуваме за елементарни услови за урбано живеење во дел од населените места.
Како што истакнав, во однос на водоснабдувањето, главниот проект е приклучување на општината кон „Студенчица“ – инвестиција што ќе обезбеди сигурна вода за сите жители, ќе ја исклучи зависноста од старите бунари и ќе ги намали трошоците на ЈП „Пелагонија“.
Во врска со канализацијата, ќе изградиме систем во сите преостанати населени места, со приклученост од 90–95% и соодветни пречистителни станици. Сегашната прочистителна станица во Кривогаштани ќе ја реконструираме и модернизираме со автоматизиран систем за управување по европски стандарди за животна средина.
Што се однесува до патиштата, најголем приоритет е заедно со ЈПДП да го прошириме регионалниот пат Р2335 (Кривогаштани–Обршани–Воѓани) и да го направиме побезбеден и побрз за сообраќај.
Општината ќе инвестира и во асфалтирање на локални улици, изградба на тротоари, пешачки патеки и осветлување.
Азманоски: Земјоделството е клучно за економијата во вашиот регион. Кои конкретни мерки ќе ги преземете за поддршка на земјоделците и за поттикнување на локалната економија?
Каравилоски: Земјоделството е двигател на нашата општина, бидејќи огромен дел од семејствата, директно или индиректно егзистираат од земјоделското производство.
Со проширувањето на индустриската зона во Славеј во Агро-индустриски центар, земјоделците ќе добијат посигурен пласман и стабилни цени.
Општината ќе организира информативни сесии, обуки и трибини за поддршка на земјоделците при аплицирање за ИПАРД/ИПА програмите, а паралелно на општинската веб-страница редовно ќе се објавуваат актуелни повици со јасни инструкции и видео-туторијали.
Исто така, редовно и навремено ќе се одржуваат пристапните патишта до земјоделското земјиште во сите населени места.
Азманоски: Како ќе ја подобрите транспарентноста и отчетноста на локалната самоуправа за да ги вклучите граѓаните во процесот на донесување одлуки?
Каравилоски: Довербата во институциите е клучна. Затоа мојата цел е општината да биде целосно отворена и блиска до граѓаните.
Ќе воведеме современа веб-платформа каде секој ќе може да следи како се трошат буџетските пари – проект по проект. Ќе објавуваме јавни набавки, договори и извештаи за реализација и ќе организираме јавни дебати и анкети за секој поголем проект, за граѓаните да имаат вистински глас во одлучувањето.
Со ова, општината ќе биде сервис на граѓаните, а не затворена институција.
Азманоски: Која е вашата визија за развој на младите во Кривогаштани и како планирате да го намалите одливот на младите од општината?
Каравилоски: Младите се срцето на заедницата и ако тие заминуваат ние немаме иднина.
Ќе го модернизираме младинскиот центар со нова опрема, простории за работа и креативност, дигитални алатки и програми за обуки. Ќе организираме курсеви за странски јазици, дигитални вештини и претприемништво.
Општината ќе издвојува посебен дел од буџетот за младите – за нивните идеи, стартапи и културни или спортски активности.
Ќе вложуваме и во образование, култура и спорт – модерни училишта, инклузивни програми и поддршка за младински фестивали и проекти. Со овие мерки младите ќе имаат перспектива овде, во својата општина, без потреба да заминуваат.
Азманоски: Доколку станете градоначалник, како ќе соработувате со централната власт и со другите општини за да обезбедите повеќе средства и проекти за Кривогаштани?
Каравилоски: Општина Кривогаштани сама не може да ги реализира сите проекти – затоа ќе работиме во партнерство. Со централната власт ќе соработуваме за инфраструктурни проекти како што се регионалниот пат Р2335 и финансирање на капитални инвестиции преку национални програми, а со соседните општини ќе развиваме заеднички иницијативи. Ќе аплицираме за европски фондови со меѓуопштински проекти, бидејќи ЕУ сè повеќе поддржува регионални иницијативи.
Со отворена и активна соработка, ќе донесеме повеќе пари и проекти и ќе ја ставиме општината на мапата на успешни и развојно ориентирани средини.
Азманоски: Еден од проблемите во многу општини е загадувањето и управувањето со отпад. Што ќе преземете за Кривогаштани да биде почиста и позелена општина?
Каравилоски: Нашата цел е Кривогаштани да стане општина со чиста и здрава животна средина. Ќе ги отстраниме дивите депонии, а во секое населено место ќе поставиме современи контејнери за селекција и рециклирање на отпадот кои веќе се набавени. Планираме да изградиме компостара за зелен отпад од јавни површини, домашни дворови и индустриски капацитети, со што ќе се намали биоотпадот и ќе се создаде органско ѓубриво за земјоделците. Дополнително, ќе ја засилиме хигиената на јавните простори со редовно чистење и одржување на парковите, улиците и тротоарите. Со уредување на нови зелени површини, ќе обезбедиме почист воздух и поубава околина.
Азманоски: Како ќе обезбедите подобри услови за ранливите категории граѓани?
Каравилоски: Во нашата општина веќе направивме чекори за инклузија – сензорна соба во градинката во Обршани, инклузивно игралиште и партнерства со невладиниот сектор за индивидуален третман на деца со попреченост. Но бројот на деца со атипичен развој расте, а семејствата често се соочуваат со економски проблеми и предизвик секојдневно да патуваат во Прилеп или Битола.
Затоа нашата цел е услугите да ги донесеме во заедницата. Дневниот центар ќе обедини терапија, психосоцијална поддршка, инклузивно образование и советување за родителите – сè на едно место и достапно за сите. Така Кривогаштани ќе стане прва рурална општина со цел спектар на социјални услуги.
Истовремено, со проектот „Здрав пензионер“ ќе овозможиме бесплатни превентивни прегледи и мобилни тимови што ќе стигнат до секое село. Со тоа ќе помогнеме нашите пензионери да живеат поздраво, подолго и достоинствено.
Така ќе покажеме дека Кривогаштани е општина која се грижи за сите, без исклучок.
