Интер е првиот финалист во Лигата на шампионите откако вечерва во неверојатен натпревар го совлада тимот на Барселона со 4-3 по продолженија (вкупно 7-6), во реваншот од полуфиналето одиграно на „Џузепе Меаца“.
Мечот понуди сè – пресврти, драма, емоции и спектакуларни голови. Италијанскиот гигант започна моќно и по првото полувреме водеше со 2-0 благодарение на Лаутаро Мартинез и прецизниот пенал на Хакан Чалханоглу. Сепак, Каталонците се вратија силно – Ерик Гарсија и Дани Олмо израмнија на 2-2, а Рафинја донесе водство во 86. минута и надеж за Барселона.
Но, токму кога сите мислеа дека е готово, Франческо Ачерби во 93. минута погоди за 3-3 и го одведе натпреварот во продолженија. Таму, Давиде Фратези се издигна како херој и со гол во 99. минута го постави конечниот резултат – 4-3 за Интер.
Финалето на 31 мај во Минхен ќе биде прво за „нераѕурите“ по 15 години, додека Барселона повторно запнува пред големото финале.
