Танзаниецот Алфонс Феликс Симбу освои историски златен медал на маратонската трка на Светското првенство во Токио, во спектакуларен финиш со фотофиниш. Ова е прв и најсјаен медал во историјата на оваа африканска земја на светските првенства.
Симбу успеа буквално да му го „украде“ златото на Германецот Аманал Петрос во последните моменти од трката. На околу 100 метри пред целта, Петрос го засили темпото и се чинеше дека ќе победи. Сепак, во последните 20 метри, Симбу пронајде нова сила и го престигна со само 0,03 секунди предност.
И двајцата маратонци ја завршија трката со време од 2:09:48 часа. Бронзениот медал го освои Италијанецот Ауани, кој пристигна пет секунди по нив.
Високата влажност во Токио беше голем проблем за многу фаворити, поради што голем број од нив се откажаа од трката, вклучувајќи тројца маратонци од Етиопија и еден од Кенија.
