Чеченскиот лидер Рамзан Кадиров изјави дека официјално побарал од рускиот претседател Владимир Путин да го разреши од функцијата, среде шпекулации за неговата здравствена состојба и можната смена на власта.
Кадиров (48), кој од 2007 година е на чело на Чеченија по назначување од страна на Путин, наведе дека е време за нови сили и идеи. Според „Новаја Газета Европа“, се шпекулира дека неговиот 17-годишен син Адам може да биде негов наследник.
„И јас ги слушнав тие гласини. Пишуваат сѐ и сешто“, изјави Кадиров за владината платформа „Чеченија денес“.
„Напротив, не е работа на гласини. Јас лично побарав да бидам ослободен од моите должности. Оној што ќе дојде по мене, ќе има свои иницијативи и визија. Се надевам дека моето барање ќе биде прифатено“, додаде тој.
Ова не е прв пат Кадиров да зборува за повлекување. Во 2017 година, во интервју за „Росија 1“, изјави дека тоа му е „животна желба“. „Тогаш беше потребен човек како мене за да се воведе ред. Сега има ред и просперитет – време е за промени“, рече тој тогаш, според Ројтерс.
