Тренерот на Наполи, Антонио Конте, порача дека клубот мора целосно да ги искористи сите свои потенцијали доколку сака повторно да ја освои титулата во Серија А.
Во неделата, Наполи се искачи на врвот на табелата по победата над Торино со 2:0, додека Интер загуби од Рома во Милано со 0:1. Четири кола пред крајот, Наполи води со 74 бода, три повеќе од второпласираниот Интер.
„Искрено, не го следев натпреварот Интер – Рома. Наместо тоа, го гледав второто полувреме од Фиорентина – Емполи. Телефонот ми беше исклучен, а резултатот го дознав дури подоцна. Можете да ми верувате, а ако не – пак е во ред“, изјави Конте.
До крајот на првенството, Наполи ќе одигра два меча дома против Џенова и Каљари, а ќе гостува кај Лече и Парма. Интер пак, ќе игра дома против Верона и Лацио, а ќе гостува кај Торино и Комо.
„Направивме важен чекор, но остануваат уште четири натпревари. Играме против екипи кои се борат за опстанок, што ја прави задачата уште потешка. Сепак, сè е во наши раце“, подвлече Конте.
Наполи последен пат ја освои титулата во 2023 година.
„Мораме да продолжиме со максимална посветеност. Тимот значително напредуваше сезонава. Со 74 освоени бода, обезбедено место во Лигата на шампионите и поглед на местото од кое започнавме, може да кажам дека ова е извонреден успех. Освојувањето на Скудетото би било неверојатно, а најголемите заслуги за тоа им припаѓаат на играчите“, заврши Конте.
