Четири месеци по најголемата трагедија во поновата македонска историја, кога животот го загубија 62 млади лица во дискотеката „Пулс“ во Кочани, денеска повторно ќе се одржи „Маршот на ангелите“ – симболична и тивка борба за правда.
Здружението на граѓани „16 март 2025 Кочани“ вечерва го организира петнаесеттиот по ред марш, кој ќе започне во 18:05 часот од Паркот на револуцијата – време кое, според организаторите, е симбол на задоцнетата и кобна институционална реакција.
„Четири месеци подоцна, тагата не стивнува. Борбата за правда штотуку започна. Ве повикуваме со отворено срце да ни се придружите – да маршираме заедно во тишина, тишина која ќе одекнува како гласно потсетување дека ваква трагедија никогаш повеќе не смее да се повтори – ниту за едно дете, ниту за една мајка“, порачуваат од Здружението.
„Маршот на ангелите“ прерасна во симбол на колективната болка и отпорот против институционалната негрижа. Од Кочани повторно ќе одекне порака: правдата доцни – но не смее да изостане.
