Претседателот на Европскиот совет, Антонио Кошта, на Самитот за проширување на Еуроњуз порача дека проширувањето на Европската Унија е „најдобрата инвестиција“ за иднината, бидејќи проширена ЕУ значи побезбедна, посилна и помирна Европа во ерата на геополитичка неизвесност и економска нестабилност.
Кошта истакна дека Украина, Молдавија и земјите од Западниот Балкан припаѓаат во Европската Унија и дека ова е прв мандат на Комисијата од 2010-2014 година каде што проширувањето е „реална можност“.
„Ова е првиот мандат на Комисијата од 2010-2014 година, каде што проширувањето е реална можност. И тоа е нашата цел и мојата цел за наредните години“, рече Кошта.
Тој ја нагласи важноста на конкретниот напредок постигнат од кандидатите за членство:
Црна Гора постигна најголем напредок и би можела да стане 28-та членка на ЕУ.
Албанија значително го забрзала напредокот.
Молдавија и Украина постигнале импресивен напредок.
Кошта изрази надеж дека Србија, Босна и Херцеговина и Северна Македонија ќе постигнат поголем напредок до крајот на годината, додавајќи дека 2025 година може да биде важна за овие земји, и се надева оти Косово ќе добие „позитивен сигнал“.
Претседателот на Европскиот совет нагласи дека ЕУ им помага на земјите кандидати да ги исполнат сите критериуми за членство преку забрзување на нивната постепена интеграција. Како пример за веќе видливи резултати, го посочи Планот за раст за Западниот Балкан и Молдавија, вреден шест милијарди евра, кој веќе го менува секојдневниот живот на луѓето преку приклучување кон Единствената зона за плаќања во евра и намалување на времето на чекање на границите.
