СВР Куманово поднесе кривична пријава против петмина вработени во Агенцијата за храна и ветеринарство за кривично дело „злоупотреба на службена положба и овластување“. Пријавените се: Р.Е. (51) од с. Слупчане, З.А. (59) од Скопје, Н.Б. (61) од Битола, А.Б. (59) од Скопје и С.К. (58) од Штип.
Според полицијата, првопријавениот, Р.Е., кој бил вработен како помлад референт-архивар во Подрачната единица во Куманово, не доаѓал на работа во периодот од 1 декември 2018 до 30 април 2024 година, но редовно примал плата и придонеси.
Кривична пријава е поднесена и против другите четворица службеници кои, според полицијата, свесно дозволиле или не презеле мерки за да се спречи овој случај:
З.А., поранешен вршител на должноста директор на Агенцијата, свесно дозволил исплата на плата на Р.Е. и покрај тоа што тој не ги извршувал своите работни задачи.
Н.Б., кој го наследил З.А. на директорската позиција, исто така дозволил да продолжи исплатата на плата.
А.Б., раководител на Одделението за финансиски прашања, потпишувал финансиски извештаи и одобрувал исплати на плата и придонеси без да ја провери редовноста на присуството на Р.Е.
С.К., раководител на Одделение во Агенцијата, не презел мерки за да ја спречи незаконската состојба.
Со оваа злоупотреба, на Р.Е. му биле исплатени 1.159.081 денари, а државниот буџет бил оштетен за 1.682.759 денари.
