Кандидатот за градоначалник на Општина Центар од Движењето ЗНАМ – За наша Македонија, Мирослав Лабудовиќ, во телевизиско соочување ги најави своите три капитални проекти и вети дека општината ќе ја направи одржлива и системски средена.
Лабудовиќ како најважни ги издвои следниве проекти:
Одржлива општина со подигнат квалитет на живеење: Ова подразбира Центар да биде чиста, безбедна, урбано средена општина со системски решенија во секој аспект.
Системско решавање на паркинг хаосот: Ќе се градат катни и монтажни гаражи во Буњаковец, Капиштец и кај новата Железничка станица. Ќе се воведе СМАРТ паркинг систем за граѓаните да знаат каде има слободни места во реално време.
Изградба на мултифункционален културен и младински центар – „Центар Хаб“: Овој центар ќе значи ново ниво во делот на културата и иновациите кај младите.
Лабудовиќ најави и изградба на нова општинска зграда, со што вработените ќе добијат подобри услови за работа, а општината 300 нови паркинг места.
Лабудовиќ го критикуваше својот противкандидат и актуелен градоначалник, Горан Герасимовски, за неажурноста со деталните урбанистички планови (ДУП).
„Од 31 ДУП-ови сегашниот градоначалник ревидирал само три, што е катастрофално од аспект на борба против урбаната мафија и средување на хаосот во овој дел. А, токму тој е рекордер во издавањето на дозволи за градба – во неговиот мандат се издадени 280-300 дозволи и на тој начин дополнително го задуши Центар“, потенцираше Лабудовиќ.
Тој, исто така, го потсети Герасимовски да не се кити со туѓи заслуги, посочувајќи дека улицата „Орце Николов“ била реконструирана од неговиот претходник.
Кандидатот на ЗНАМ најави сериозна битка за секоја педа зелен простор и создавање на нови пешачки зони, како што се улиците „Мирослав Крлежа“, „50 дивизија“ и паркинг просторот кај општинската зграда, кој е предвиден за плоштад.
Меѓу другите мерки се најавени:
- Тесна соработка со Град Скопје за надминување на сообраќајниот колапс преку создавање квалитетен јавен превоз.
- Сериозно системско решение за селекција и рециклирање на отпадот во соработка со фирмата „Пакомак“, каде граѓаните ќе добиваат и враќање на средства.
- Посебна дислокација на градежен отпад и наплата на средства од уривање на објекти, кои ќе се користат за одржување на јавната чистота.
