Партијата Левица излезе со жестока реакција, нарекувајќи ги „политичка манипулација“ тврдењата на пратеникот Бојан Стојаноски од ВМРО-ДПМНЕ дека „растот на реалната плата“ е двојно зголемен за една година, а инфлацијата е „стабилизирана“. Во соопштението се наведува дека ваквите изјави целосно ја игнорираат реалната економска состојба во која живеат над половина милион работници во Македонија.
Според Левица, ВМРО-ДПМНЕ се повикува на раст на реалната плата од 6,7% за да докаже дека граѓаните живеат подобро, но прашуваат „Кој народ?“
Повеќе од 70% од работниците земаат плата под просекот
Од Левица потенцираат дека статистиката ја крие суровата реалност. Во мај 2025 година, од вкупно 509.960 работници, дури 374.045 или 73,3% добивале плата под просечната. Уште поалармантно, 169.082 работници или 33,1% преживуваат со плата под 30.000 денари, што е двојно пониско од синдикалната минимална кошница, која во август 2025 година достигна 65.507 денари.
„Овој парадокс ја разобличува суштината и го истакнува фактот дека растот на реалната плата во статистиките на ДПМНЕ не го чувствуваат мнозинството граѓани“, се вели во соопштението.
„Стабилизирана инфлација“ постои само на хартија
Левица ги обвини властите и за манипулација со податоците за инфлацијата, наведувајќи дека просечната инфлација од 3,6% за периодот јули 2024 – јули 2025 е „вештачки измазнета“. Партијата тврди дека оваа бројка ги крие реалните поскапувања на храната, енергенсите и кириите, кои во последните пет години се зголемени за 30-40%.
Според нив, платите не го следат растот на цените, а работничките семејства се соочуваат со постојана неизвесност, долгови и осиромашување.
Левица инсистира на итни мерки за заштита на граѓаните, вклучувајќи ефективна контрола на цените, зголемување на минималната плата на 500 евра, подобрување на социјалните мерки и транспарентност во монетарната и фискалната политика.
