Кандидатката за градоначалник на Општина Прилеп од СДСМ и Коалицијата, Петра Лукароска, ја презентираше својата изборна програма во ЦК „Марко Цепенков“, фокусирајќи се на три големи, капитални проекти за трансформација на градот.
1. Паркинг платформи над Градска Река
За решавање на сообраќајниот хаос, Лукароска најави изградба на две паркинг-платформи над коритото на Градска Река, кои ќе обезбедат 100 нови паркинг-места.
Локација: Помеѓу мостот на ул. „Методија Шаторов Шарло“ и ООУ „Кочо Рацин“.
Опрема: Модерно ЛЕД осветлување, видео надзор, паметна е-наплата и јасна сигнализација.
Дополнително: Ќе бидат изградени конзолни проширувања за пешачка и вело-патека со зеленило и урбана опрема од двете страни на речното корито.
2. TOPTASH SKYLINE: Парк за активен туризам
Вториот проект е TOPTASH SKYLINE – модерен парк на локација Шаторов Камен до Топташ, на вкупна површина од 10 хектари, чија цел е развој на активниот туризам и рекреација.
Проектот предвидува:
Инфраструктура: Пристапен пат, паркинг, велосипедски патеки, мотокрос траса и ЛЕД осветлување.
Содржини: Skyline панорамски платформи, кампинг зона, детски игралишта, летниковци, болдеринг, фитнес и јога зони, патека за трчање и зона на тишина.
3. Младински културен центар
Третиот клучен проект е изградба на современ Младински културен центар зад спортската сала „Партизан“, кој треба да стане нов простор за креативност и култура за младите.
Центарот ќе вклучува:
Простории: Мултимедијални сали, музички и театарски простори, уметнички работилници и изложбен простор.
Иновации: Co-working зона, дигитален хаб за ИТ-обуки и стартап иницијативи, Gaming простор.
Социјални содржини: Простори за ментално здравје, младинско кафуле, зелена зона и урбана градина.
На презентацијата беа претставени и кандидатите за членови на општинскиот Совет од листата на СДСМ и Коалицијата, чија носителка е Драгица Николоска.
