Министерството за внатрешни работи соопшти дека континуирано презема мерки и активности за непречено и безбедно спроведување на „Локални избори 2025“, со цел гарантирање на фер и демократски изборен процес.
На денот на изборите, полициски службеници ќе бидат присутни во близина на избирачките места, како и на клучните сообраќајни точки. За зголемена ефикасност и брза реакција, МВР ќе користи стандардни материјално-технички средства, мобилни тимови и пунктови, како и современа технологија – дронови за воздушна контрола.
МВР апелира до сите граѓани и политички партии да придонесат за мирна и демократска атмосфера, да ги почитуваат упатствата на полициските службеници и да се воздржат од активности кои би можеле да го нарушат изборниот процес.
Во текот на изборниот ден, МВР ќе ја информира јавноста за одвивањето на процесот.
