МВР продолжува со засилени контроли во шумските предели ширум државата, а последниот случај доаѓа од струмичкиот регион. На 12 јули 2025 година, полициските службеници од СВР Струмица затекнале осум лица како се движат во шума без соодветно одобрение, со што ја прекршиле важечката забрана за движење во шумски подрачја.
Забраната, која стапи на сила на 1 јули и ќе трае до 31 август 2025 година, има за цел да спречи пожари и да ја зачува природата во најкритичниот летен период. Затекнатите граѓани не поседувале дозвола за движење издадена од ЈП „Национални шуми“, поради што биле пријавени во Шумската полиција Струмица.
Постапката против нив ќе се води согласно член 57 став 3 од Законот за шуми, а надлежните институции најавуваат засилени контроли и ригорозни санкции за сите прекршители.
МВР апелира до граѓаните да ја почитуваат забраната, бидејќи секое непочитување претставува ризик не само за шумите, туку и за безбедноста на луѓето и животната средина.
