Министерството за внатрешни работи (МВР) излезе со официјално соопштение во врска со претресот во домот и канцеларијата на М.Л. (57) од Демир Хисар. На 8 август 2025 година, полициски службеници извршиле претрес, по претходна пријава за сомнеж за кривично дело „Одземање или уништување службен печат или спис“.
Како што се наведува во соопштението, претресите се извршени врз основа на судска наредба од Основен суд Битола.
Прво, во периодот од 19:25 до 20:20 часот, бил извршен претрес во домот на М.Л.
Потоа, од 20:45 до 21:30 часот, бил претресен и кабинетот што М.Л. го користи во средното училиште.
МВР потврдува дека на претресите присуствувал и адвокат, како што налага законската процедура.
Ќе се испитуваат реакциите на јавноста
Во однос на реакциите на јавноста за постапувањето на полициските службеници за време на претресот, МВР најави дека Одделот за внатрешна контрола, криминалистички истраги и професионални стандарди веќе презема соодветни мерки. Оттаму, велат дека јавноста ќе биде дополнително известена за исходот од оваа истрага.
