Министерот за здравство, Азир Алиу, денеска одржа работна средба во Тетово, на која присуствуваа директорот на Клиничката болница, Ерзен Елези, и градоначалникот Биљал Касами. Главна тема на состанокот беа инвестициите во инфраструктурно унапредување на болницата, како и плановите за нови вработувања.
Министерот Алиу најави дека Владата одобрила инвестиција од над 70 милиони евра за тетовскиот кампус. Оваа сума е наменета за изградба на два нови павилјона за онкологија, инфектологија, дерматологија, психијатрија и гинекологија. Исто така, средствата ќе се искористат за реконструкција на постојните хируршки и интернистички блокови и за целосно уредување на болничкиот двор.
Работната група ќе подготви извештај за потребите на болницата, врз основа на кој ќе се буџетираат сите неопходни инвестиции.
Во однос на вработувањата, Алиу информираше дека постапката за пополнување на постоечкиот конкурс е во тек, но поради законските пречки пред локалните избори, последниот чекор ќе се реализира по нивното завршување.
Министерот додаде дека анализите покажуваат потреба од околу 300 нови вработувања во болницата, по што ќе се отвори нова постапка за вработување.
