Министерката за енергетика, рударство и минерални суровини (МЕРМС), Сања Божиновска, соопшти дека Министерството воспоставува системски пристап за правна заштита на државата во сите судски постапки и за првпат активно покренува тужби за наплата на долгови од должници.
Божиновска истакна дека во минатото, државата била „оставена без активна правна заштита“ – не биле оспорувани клучни докази и не биле преземани мерки за застареност на побарувањата.
„Министерството го менува тој пристап: активно се вклучува во секоја судска постапка, бара стручни вештачења, ја координира одбраната со Владата, иницира постапки за наплата на долгот на државата. Обврска ни е да ги штитиме средствата на граѓаните и ставаме ред во правните постапки,“ вели Божиновска.
МЕРМС, по преземањето на надлежностите од поранешното Министерство за економија, затекнало шест судски предмети со вкупна вредност од 421.862.824 денари (околу 6,86 милиони евра).
Министерката најави дека веќе има конкретни резултати од новиот активен пристап:
Одбиени се две тужби против државата во вредност од 315 милиони денари, со што буџетот е заштитен од огромни трошоци.
Вкупната вредност на предметите против Министерството е намалена од 421,8 милиони на 106,8 милиони денари.
При увидот во документацијата, Секторот за правни работи утврдил дека воопшто немало поднесено тужби против должници (физички и правни лица) за неплатен концесиски надомест и други долгови.
Како одговор на ова, Министерството покренало 17 постапки за наплата на долгови во вкупна вредност од 32,8 милиони денари, од кои дел веќе се завршени со спогодби и позитивни пресуди.
Истовремено, на Управен суд се водат околу 20 предмети поврзани со концесии, со веќе воспоставена позитивна пракса за одбивање на тужби против државата.
