Министерството за енергетика, рударство и минерални суровини започнува со практична примена на Законот за енергетика, воведувајќи транспарентен и предвидлив процес за планирање на енергетскиот развој. За прв пат, ќе биде изготвен Годишен план за развој на енергетскиот систем, кој ќе ги дефинира приоритетите за изградба на нови објекти и зајакнување на енергетските мрежи.
Според министерката Сања Божиновска, ова е од особена важност за државата, бидејќи обезбедува јасна слика за приоритетите и овозможува стратешко насочување на инвестициите.
Повикот е отворен за сите инвеститори
Министерството објави на својата веб-страница (https://portal.mdt.gov.mk/post-body-files/dokumenti-file-wrMD.docx) детални документи и упатства за поднесување иницијативи за развој на енергетски проекти. Процесот е отворен за сите – приватни компании, физички лица, општини или јавни претпријатија.
Што значи ова за инвеститорите?
- Правна сигурност: Иницијативите ќе бидат детално технички обработени уште во рана фаза, со јасно дефинирани можности за приклучок на мрежата и потребните надградби.
- Предвидливост: Ќе се елиминираат несигурностите околу приклучувањето на проектите, што ќе овозможи подобри предуслови за финансиска поддршка.
- Јасни критериуми: Секоја иницијатива ќе биде анализирана врз основа на видот на технологијата, техничките карактеристики, моќноста, регионот и можностите за приклучок.
Крајниот рок за доставување на иницијативи за 2026 година е 30 септември 2025 година. По овој датум, Министерството ќе го изготви Годишниот план за развој на енергетскиот систем.
